FAQ

Q: Kifer bizen enn nouvo sistem?

Depi 2004, komite APM, (Automatic Pricing Mechanism) ti pe zwenn toule-trwa mwa pou fixe pri detay bann prodwi petrolie kouma lesans ek diesel. Apartir Novam 2008 komite la ti koumans zwenn toule-mwa akoz pri lor marse mondial ti pe monte-desann tro vit e sa mouvman la ti koumanse an Me 2008.

Sistem APM ti koumans vinn pa tro korek e piblik ti pe perdi konfians parski ti toultan ena enn gap ant pri lor marse mondial ek pri ki APM ti pe propoze. Mwa apre mwa, pri monte-desann kouma yoyo. Dimoun an zeneral pa ti pe trouv ogmantasion rezonab sirtou ki ler ti pe anons ogmantasion dan Moris, pri lor marse mondial ti pe bese. Kan pri ti bese, tou dimoun ti panse ki li pa ti pe bese kouma bizen ousa sanzman ti tro lan. Konfians ant APM ek piblik ti disparet.

Anplis dimoun pa ti pe konpran bann diferan fakter ki rant dan kalkil pri.Li ti vinn deplizanpli kler ki ti bizen devlop enn sistem pli transparan ek pli stab.

Q: Ki ameliorasion nouvo sistem pou amene?

Pri pa pou sanze toule-mwa. Sanzman pou vinn neseser selman kan finn ena bel boulversman dan tandans pri lor marse mondial. Nouvo pri pa pou rant anviger sak fwa ki enn nouvo kargezon debarke.

Obzektif nouvo sistem se fer maximem pou ki bann sanzman lor marse mondial pa boulvers tro lavi ekonomik ek sosial dan pei. Li pou sey absorb sok e protez pri detay. Bann pri detay pou baze lor enn mwayenn CIF (cost: pri ki nou pey rafinnri; Insurance: lasirans; Freight: pri ki tengker reklame pou transport marsandiz) lor enn peryod 1 banane.

Li enportan osi ki nou pran kont pri ki finn peye pandan dernie 6 mwa e estimasion ek prediksion Platts pou 6 mwa ki vini. Pa bliye ki Platts li enn sours lenformasion serye ki lendistri petrol enternasional servi.

Q: Kouma pou stabiliz pri detay kan pri sak kargezon ki nou aste li sanze?

Parski STC enport tou bann prodwi petrolie e lerla vann zot ar bann konpagni kouma Chevron, Indian Oil, Shell ek Total ki okip stokaz ek distribision nou an pozision pou manej enn Kont Stabilizasion Pri e anpes pri detay lokal tro soufer bann sok ki koze par fliktiasion dan marse mondial.

Q: Kifer bizen stabiliz pri prodwi petrolie?

Kan enn prodwi li vital pou lavi ekonomik ek sosial enn pei (e lesans ek diezel zot de bon lekzanp) li neseser ki zot pri res stab pou ki gouvernman ek sekter prive kapav fer plan devlopman lor enn long peryod. Sinon sitiasion kapav vinn katastrofik e bann dimoun pov pou soufer boukou.

Q: Kan pri bese, ki so rediksion minimem / maximem?

Si poursantaz rediksion ant pri estime ek pri reel

a) li anba 7% pri detay pou res entak. Lamone anplis pou al dan Fon Stabilization Pri;

b) li ant 7% ek 10%, pou ena enn rediksion dan pri lavant detay;

c) li plis ki 10%, sanzman pri pa pou depas 10%

Q: Kan pri monte, ki ogmantasion minimem/maximem?

Si poursantaz ogmantasion ant pri estime ek pri reel

a) li anba 5%, pa pou ena sanzman dan pri. Pou servi lamone dan Fon Stabilization Pri pou kouver lapert ki STC finn fer;

b) li ant 5% et 15%, konsomater pou pey ladiferans;

c) li plis ki 15%, ogmantasion pa pou depas 15%.

Q: Komie fwa par an pri pou sanze?

Apartir Zanvie 2011 Komite Pri Petrol (Petroleum Pricing Committee – PPC) pou zwenn sak fwa ki li neseser e omwen 1 fwa toule-kat mwa pou analiz sif, data ek sitiasion dan lemonn e propoz pri detay.

Sanzman pri pou lesans ek diezel pou fer separeman e pou consider pri lor marse mondial ek fon ki disponib dan Fon Stabilization Pri.

Q: Ki bann fakter ki enflians pri detay?

Pri li enflianse dabor par lof ek demann. Si demann for me lof feb, pri monte; si lof for ek demann feb, pri bese. Si dan lemonn ena lager ousa movetan ki aferke lof, normal pri pou monte.

Si demann pe monte parski bann pei kouma Lasinn ek Lenn pe devlope lor vites, pri petrol pou monte me si aktivite ekonomik pe ralanti, demann pou bese e pri pou bese.

An 2008 ti ena enn kriz ekonomik mondial e pri petrol ti koumans tonbe me depi 2010 ekonomi mondial finn koumans relanse e pri pe monte.

Peyna lezot fakter?

Bien sir ena lezot fakter. Kan nou aste prodwi petrolie, bizen pey tengker pou sarye li, amenn li Port Louis; bizen debarke e avoy dan tenk pou stokaz; lerla bizen pey kamion-sitern pou alimant bann filing.

Tousa kout lamone. Sa bann travay la zot fer par bann biznes prive ki finn envesti gro lamone e bizen donn zot enn marz profi pou ki zot kapav kontinie zot biznes ek fer nouvo envestisman ets.

Lor tousa nou bizen azout tax, drwa ek prelevman ki gouvernman deside. Tou gouvernman dan lemonn taxe prodwi petrolie pou gagn sifizaman resours pou kapav rann lavi bann sitwayen plis agreab. Bann tax la zot fer dapre enn som fix par lit e pa lor valer prodwi la. Savedir ki mem kan pri monte, montan tax res fix.

Tranzaksion petrol fer ar dolar Ameriken. Savedir si valer dolar monte, pri petrol monte. Si valer roupi par rapor ar dolar pe bese, nou pou pey petro pli ser ler nou aste li.Ena osi TVA ki reprezant 15% valer prodwi la. Ler pri petrol monte, montan TVA si monte.

Q: Eski tax dan Moris li pli ot ki dan lezot pei?

Dapre lenformasion ki nenport kisannla kapav cheke, tax ek drwa asiz dan Moris zot parmi pli ba dan lemonn. USA ki prodwir ek enport petrol ena enn tax 25% lor lesans ek diesel (diferan leta dan USA ena diferan barem); ena pei Eropeen ki met enn tax ki bien pli ot ki 60%.

Dan Moris bann tax, drwa ek prelevman ki servi pou donn sibsid lor gaz domestik, diri rasion ek lafarinn ets., zot reprezant 40 a 55% pri ki konsomater peye kan li aste lesans ek diezel dan filing.

Q: Ki bann fakter ki enflians pri detay dan filing?

Bann pri lesans ek diezel ki STC vann ar bann konpagni lesans, pri ki konpagni vann ar filing, pri ki filing vann ar partikilie li fixe pa lalwa.

STC donn tou detay PPC (Petroleum Pricing Committee): komie sak kargezon finn koute; komie tax, drwa ek prelevman finn koute. PPC ki enn komite profesionel ek exper endepandan (okenn manm STC pa gagn drwa sieze ladan) etidie bann sif ek dokiman e donn so lopinion lor pri ki STC pe propoze. Lerla li fer so rapor e se gouvernman ki pran desizion final dan lentere tou dimoun.

Pri li baze lor enn model ki lalwa done dapre Regleman gouvernman ki pibliye dan Lagazet Gouvernman tanzantan e ki bann lagazet prive osi pibliye.

Pou ed dimoun konpran tou bann item ki konsidere pou fixe pri lesans ek diezel dan filing, ala seki bizen kone:
• PLT (CIF: pri aste, lasirans ek transpor)
• Tax, drwa ek prelevman
• Depans STC
• Marz profi pou distribiter (Shell, Total, Chevron, Indian oil)
• Azisteman
• Kont Stabilizasion Pri
• TVA
• Marz profi pou filing

Nou finn deza koz lor tax, drwa ek prelevman gouvernman. Depans ek profi distribiter ek filing zot fixe par lalwa. Bann data ki fliktie se PLT ek TVA kouma nou finn explike lao.

Q: Ki bann letap pou kalkil pri lesans ek diezel avan li rant dan filing?

• Pri petrol brit (avan rafinaz) dapre propozision Platts;
• Transpor petrol brit ziska rafinnri;
• Rafinaz petrol brit pou prodwir lesans ek diezel (ek osi lezot prodwi kouma petrol pou lalanp, bitim    ets.);
• Transpor ek lasirans pou amenn prodwi la ziska debarkader dan Port Louis;
• Ponpaz lesans ek diezel pou avoy zot dan bann tenk stokaz kontrole par bann konpagni prive. PLT    (CIF) anglob tou bann depans depi rafinnri ziska tenk stokaz.

Q: Apre premie renion PPC, ki bann nouvo pri lesans ek diezel?

Tablo 1 donn enn lide kler striktir pri lesans ek diezel e ed nou pou konpran nouvo pri dan filing.

Tablo 1

Q: Pou lavant sak lit lesans ek diezel komie gouvernman pran?

Tou gouvernman dan lemonn taxe lesans ek diezel. Dan bann pei ris ek devlope (OCDE) tax la li anviron 60% pri detay. Dan Langleter, Oland, Tirki, Kore Sid li bien pli ot. Dan Moris ler azout tou tax, drwa ek prelevman li fer ant 40% ek 55% pri detay.

Tablo 2 donn nou detay lor tax, drwa ek prelevman lor lesans ek diezel.

Q: Kouma servi lamone tax lor lesans ek diezel?

Enn gran parti sa tax la servi pou anpes kou lavi vinn tro ser. Grasa sa tax la gaz domestik, diri rasion ek lafarinn ki nou nouritir bazik, res abordab sirtou pou nou bann konpatriyot ki pov.

Gouvernman depans plis ki 1.2 miliar roupi (1,200,000,000 roupi) pou asire ki dimoun dan pens gagn omwen zot bouse manze. Sinon sitiasion ekonomik ek sosial ti pou rant dan tirbilans.

Repartision sibsid


Sak fwa nou aste enn lit karbiran nou pe ed dimoun manz vant plen, nou pe ed konstrision ek devlopman larout e nou pe permet bann Rodrige gagn enn bon fournitir karbiran. Anplis nou pe ed pou konstrir Moris Il Dirab ki pou asir nou sirvi ek nou lavenir.

Q: Eski bann tax lor lavant lesans ek petrol zot ase pou pey sibsid gaz, diri rasion ek
     lafarinn?

Oui. STC enport 1.3 milion tonn prodwi petrolie par an. Ladan anviron 400,000 tonn servi pou alimant navir ek avion. Profi ki nou fer, olie li al dan lakes leta (gouvernman), li servi pou sibvansionn pri bann prodwi kouma gaz domestik, diri rasion, lafarinn.

Q: Kifer STC pran 37 sou lor sak lit?

Pou tou travay ki nou fer (akizision, fre transpor, revant ar distribiter, pey fre sanzman dan valer deviz ki fliktie) STC reklam 37 sou par lit karbiran. Sa li reprezant selman anviron 25% marz profi ki bann filing gagne.

Q: Kisannla fixe pri lesans ek diezel dan Repiblik Moris? Marse? STC? Gouvernman?

Lalwa lof ek demann enflians pri lor marse mondial. STC kalkil pri detay ki Komite Pri Petrol (PPC) verifie. Pri la pran kont bann fakter ki finn enimere lao: pri petrol brit + kou rafinaz + CIF (PLT) + marz profi distribiter ek detayan + tax. PPC etidie bann sif ek dokiman e donn so lopinion lor pri ki STC pe propoze. Tousa li fer dan transparans.

Q: Kouma Komite Pri Petrol (PPC) fonksione?

Dan fotey KPP (PPC) ena Direkter Biro Santral Statistik. Bann lezot manm zot pou bann profesionel ek bann exper endepandan. Okenn reprezantan STC pa ena drwa siez dan sa komite la.

Apartir Zanvie 2011 Komite la pou zwenn omwen enn fwa toule-kat mwa e li pou fixe pri lesans ek diezel dan enn fason kler ek transparan e sa pou permet konsomater konpran kimanier pri pe fixe.

Tou bann data pou disponib lor sayt STC http://www.stcmu.com. Bizen note ar lafors ki KPP gagn drwa chek tou dokiman, kontra ek sif.

Q: Ki bann fakter ki enflians pri bann prodwi petrolie ki nou enporte?

Dabor ena piblikasion Platts ki sorti toule-zour ki donn nou pri lor marse mondial. Answit ena prim lor ki nou tom dakor ar rafiner. Lorla bizen azout transpor ek lasirans.

Q: Kisannla founiser STC?

STC finn sign enn kontra fournitir pou 3 an (ziska 2013) ar rafinnri Endien MRPL (Mangalore Refineries and Petrochemicals Ltd) ki ase pre ar Moris. 8 zour par bato. Dan kontra la li bien spesifie ki pri li determine par kalkil Platts lor petrol brit plis marz ki nou negosie ar rafiner ki reprezant pri rafinaz.

Eski li normal sa?

Wi. Tou kliyan ek negosian pey dapre Platts plis marz ki zot finn negosie ar rafiner.

Q: Kifer gard kontra la sekre?

An zeneral li enn kontra standar ki donn detay lor pri, kantite prodwi, kalite prodwi, kondision livrezon. Me ena enn ti bout ki bizen res sekre pou bann rezon komersial. Se enn sekre biznes ki enn pratik kouran. Tou koze pa bon koze. Nou pa kapav met nou fourniser dan enn sitiasion anbarasan vizavi lezot kliyan. Si nou finn gagn enn pri spesial nou pa kapav tap tanbour. Samem apel sekre negosiasion. Anverite sa sekre la li enn ti detay. Seki esansiel li dan domenn piblik.

Q: Alor peyna transparans?

Li enportan ki piblik kone ki sa lenformasion la, mem si li sekre, nou oblize kas lakle e rann kont ar bann oditer ki veye ki lamone piblik pa pe gaspiye.